२० वर्षीया महिलालाई बलात्कार गरेको आरोपमा कञ्चनरूप नगरपालिका–१० बदगामा भौडाहा टोलका ३० वर्षीय चन्दन खत्वे विरुद्ध इलाका प्रहरी कार्यालय कञ्चनरूपले माघ २४ गते उजुरी दर्ता गरेको छ । घरको दक्षिण तर्फको कोठामा एक्लै सुत्ने गरेकी पीडित निदाएका बेला माघ ११ गते राती प्रवेश गरेका आरोपितले गर्भमा रहेको बालक मारि दिने धम्की दिई बलात्कार गरेको पीडितले बताउनु भयो । पीडितका पति मजदुरी गर्न तीन महिना अघि भारतको पञ्जाब गएको र पीडित सासु, ससुरासँग बस्दै आउनु भएको छ । बलात्कार गरेका आरोपित टाटीबेरा भत्काई भागेको पीडितले बताउनु भयो । पीडितले माघ १२ गते इलाका प्रहरी कार्यालय कञ्चनरूपमा उजुरी दिएपछि सोही दिन पीडितको स्वास्थ्य परीक्षण गजेन्द्रनारायण सिंह अस्पताल राजविराजमा भएको छ । आरोपित फरार रहेको र खोजतलाश भइरहेको इलाका प्रहरी कार्यालय कञ्चनरूपले जानकारी दिएको छ ।