मिटरब्याजी पीडित र प्रहरी बीच सोमबार शान्तिबाटीकामा भएको झड्पमा डिएसपीसहित ८ जना प्रहरी घाइते भएका छन् । प्रहरी वृत दरबारमार्गमा कार्यरत डिएसपी कोपिला चुँडालसहित ८ जना प्रहरी घाइते भएको जिल्ला प्रहरी परिसर काठमाडौंका सूचना अधिकारी (एसपी) सिताराम रिजालले रातोपाटीलाई बताए । झडपमा मिटरब्याजी पीडितहरुतर्फ २० जना घाइते भएका छन् । दुवै तर्फका घाइतेहरुको बीर अस्पताल स्थिा ट्रमा सेन्टरमा उपचार भइरहेको छ । प्रदर्शनमा संलग्न ३५ जनालाई प्रहरीले पक्राउ गरेको थियो । उनीहरुलाई रिहा गरिएको एसपी रिजालले बताए । शान्तिबाटीका भित्र कार्यक्रम गर्ने भनिएपनि मिटरब्याजी पीडितहरु भाटा लिएर सिंहदरबारतर्फ अघि बढेपछि झडपको अवस्था आएको प्रहरीको भनाइ छ । एसपी रिजाल भन्छन्–‘शान्ति बाटीकाभित्र कार्यक्रम गर्नुस् भनेर आग्रह गर्दा प्रहरीमाथि इँट्टा बर्साउने काम भएपछि झडपको अवस्था आएको थियो ।’