कञ्चनपुरको भीमदत्त नगरपालिका-८ तिलाचौरमा १४ वर्षीया किशोरी बलात्कार गरेको आरोपमा एक जना पक्राउ परेका छन् । १९ वर्षीय पारस ठकुरी देउवालाई शुक्रबार बिहान पक्राउ गरेको प्रहरीले जनाएको छ । किशोरीलाई बिहीबार राति घरबाट बोलाएर जबरजस्ती गरेको जाहेरी आएको जिल्ला प्रहरी कार्यालय कञ्चनपुरका डिएसपी प्रकाश डाँगीले बताए । उनका अनुसार पक्राउ परेका देउवा र किशोरीको सामाजिक सञ्जाल फेसबुकबाट परिचय भएको थियो । त्यही आधारमा घरबाट बोलाएर बलात्कारको घटना भएको डाँगीले बताए । पीडित किशोरीका अभिभावकले शुक्रबार बिहान जाहेरी दिएका हुन् । त्यसकै आधारमा देउवा पक्राउ परेका हुन् । देउवालाई सघाउने अन्य व्यक्तिसँग पनि सोधपुछ भइरहेको डाँगीले बताए ।