३ असार, काठमाडौं । संखुवासभाकी एक जना १५ वर्षीय किशोरीलाई जागिर लगाइदिने प्रलोभन दिएर काठमाडौंमा ३ जना व्यक्तिले बलात्कार गरेको भेटिएको छ ।

१५ माघ २०७९ मा संखुवासभास्थित घरबाट भागेर आएकी किशोरी काठमाडौंमा जसको शरण लिएर बसिन्, त्यहीँ पटकपटक बलात्कृत भएकी हुन् ।

बलात्कारमा संलग्न रहेको आरोपमा प्रहरीले रसुवाका ३७ वर्षीय रामचन्द्र तामाङ, ३६ वर्षीय मिङ्गमा तामाङ र संखुवासभाका २६ वर्षीय अजय लिम्बुलाई पक्राउ गरेको छ । लिम्बु नेपाल प्रहरीका कर्मचारी हुन् ।

जिल्ला प्रहरी परिसर, काठमाडौंका अनुसार पीडित किशोरी संखुवासभास्थित घरबाट भागेर सुरुमा ललितपुरको सातदोबाटोस्थित एक जना आफन्त कहाँ बसेकी थिइन् ।

उनका अनुसार राईको कोठामा अजय लिम्बु पनि बेलाबेला गइराख्थे । तारकेश्वर नगरपालिका–५ मा रहेको कोठामा सुतिरहेका बेला ४ फागुनमा मध्यराति १२ बजेतिर लिम्बु अचानक कोठामा आएको पीडितको भनाइ छ ।

कसैलाई भने जे पनि गर्ने भन्दै धम्की भएपछि आफू चुपचाप त्यहीँ बसेको उनले बताएकी छन् ।

‘राईकै कोठामा बसेको अवस्थामा १० फागुनमा आशिषले पनि आएर म तिमीलाई धेरै माया गर्छु, राम्रो काम समेत लगाइदिन्छु भनेर जबरजस्तीकरणी गर्नुभयो’, पीडितले भनेकी छन् ।

त्यतिबेला उनको नजिकै डेरा गरी बस्ने मिरा तामाङसँग चिनजान भयो । उनले ‘काठमाडौंमा तिम्रो कोही रहेनछ’ भन्दै आफ्नो घरमा काम गर्दै बस्न अफर गरिन् ।

२४ चैत २०७९ मा मिङ्गमा ३÷४ जना साथीहरुसँग कोठामा आएका थिए । त्यसबेला दिदी, भिनाजु र साथीहरुले बसेर मदिरा सेवन गरेको उनले बताइन् ।

तर, मध्यराति ढोकामा चुकुल लगाएर आफूलाई तामाङले बलात्कार गरेको भन्दै प्रहरीमा किटानी जाहेरी परेको थियो । ‘तामाङले मलाई विभिन्न डर, धम्की दिएर बलात्कार गरे, त्यतिबेला ममाथि गलत काम गरिसकेपछि म भागेर बाहिर समेत गएको थिएँ’, उनी भन्छिन् ।

किशोरी अहिले गर्भवती भएको दुई महिना नाघेको प्रहरीको भनाइ छ । गर्भ बसेपछि विभिन्न व्यक्ति हुँदै परिवारसम्म पुगेर यो घटना बाहिर आएको हो । पीडितले बच्चा कसेको हो भन्ने आफूलाई थाहा नभएको बताएकी छन् । प्रहरीले डीएनए जाँचका लागि नमूना समेत लिएको छ ।

पीडित किशोरीका दाइले काठमाडौं आएर प्रहरी वृत्त, बालाजुमा किटानी जाहेरी दिएका थिए ।

सोही जाहेरीको आधारमा प्रहरीले अनुसन्धान सकेर रायसहितको अनुसन्धान प्रतिवेदन जिल्ला सरकारी वकिलको कार्यालय, काठमाडौंमा पठाएको थियो । प्रतिवेदनका आधारमा जिल्ला अदालत, काठमाडौंमा सरकारी वकिलले मुद्दा दायर गरेको थियो ।

त्यसक्रममा अदालतले आइतबार तीनै जनालाई पुर्पक्षका लागि थुनामा पठाउने आदेश दिएको जिल्ला प्रहरी परिसर, काठमाडौंका एसपी सीताराम रिजालले अनलाइनखबरलाई बताए ।