बैरबा गाविस-३ स्थित कोसी नदीको पश्चिम तटबन्धनजिक हत्या गरी फालिएको अवस्थामा ०७१ पुस १९ गते तीन बालबालिकाको लास फेला परेको छ । सप्तकोसी नदीको पश्चिम तटबन्धको पूर्वतर्फजमेको पानीमा बालबालिकाको लास बेवारिसे अवस्थामा फेला परेको डिएसपी एवं प्रवक्ता केदार ढकालले बताए । डिएसपी ढकालले छ वर्षीय बालक, तीन वर्षीया र छ महिनाकी काखे बालिकाको लास पानीबाट निकालेको जानकारी दिएका छन् । सनाखत हुन नसकेको ती बालबालिकालाई विष सेवन गराई हत्या गरेर फालेको हुनसक्ने प्रहरीले अनुमान गरेको छ । प्रहरीले घटनास्थलबाट विषको बोतल, एक थान सारी र महिलाले लगाउने एक जोडी चप्पलसमेत बरामद गरेको जनाएको छ । घटनाबारे अनुसन्धान भइरहेको डिएसपी ढकालले बताए । लासलाई पोष्टमार्टमका लागि राजविराजस्थित गजेन्द्रनारायण सिंह सगरमाथा अञ्चल अस्पतालमा राखिएको छ ।