बसुदेवपुर गाविस-१ की ५८ वर्षीया तिली दमाइले आफूलाई बोक्सी आरोप लगाएर बहिनी र भाइले कुटपिट गरी घरनिकाला गरेको भन्दै पुस २७ गते महिला तथा बालबालिका कार्यालयमा निवेदन दिएकी छन् । महिला तथा बालबालिका कार्यालयले घटनाको अनुसन्धान गरी दोषीलाई कारबाहीको माग गर्दै जिल्ला प्रहरी कार्यालयलाई लेखी पठाएको जानकारी दिएको छ । आमाको रेखदेख गरेवापत सात कठ्ठा जमिन पाएकी तिलीलाई बहिनी पप्पी वंशी र भाइकी छोरी लक्ष्मी परियारले कुटपिट गरेको पीडितले बताइन् । पीडितका भाइ डम्बरबहादुर परियारको पुस ८ गते मृत्यु भए पछि सोही ठाँउकी डोलीनी मगर, नेमकुमारी र बहिनी पप्पीले भाइकी छोरी लक्ष्मीलाई उक्साएर बोक्सी आरोप लगाउँदै पुस १८ गते कुटपिट गरी घरबाट निकालेको बताइन् । जिल्ला प्रहरी कार्यालयका डीएसपी सुशीलसिंह राठोरले पीडितको निवेदन आएको र घटनाका सम्बन्धमा बुझ्ने बताए । विनोद पाण्डे