जिल्ला प्रहरी कार्यालय रोल्पाले एक महिलालाई बन्धक बनाई बलात्कार गरेको आरोपमा दुई जनालाई पक्राउ गरेको छ । पक्राउ पर्नेहरुमा गैरीगाउँ गाविस–५ का ३४ वर्षका झकास भनिने गोपाल बुढा र बलात्कार गराउन सहयोग गर्ने कोटगाँउ गाविस–४ की २६ वर्षकी जर्सीमाली सुनार रहेका छन् । गएको जेठ ३ गते जर्सीमालीले पीडित महिलालाई मोबाइल किनि दिन्छु भनि लिबाङ बजार ल्याई झकाससँग भेट गराइदिएको प्रहरीले बताएको छ । मोबाइल किनिदिने दाई उहाँ नै हो भनि लिबाङस्थित एक होटलमा एक रात बसी अर्काे दिन लिबाङ भन्दा तिला बजारमा राम्रो मोबाइल पाइन्छ भनि तिला बजारमा लगेर आरोपित झकासले ५ दिनसम्म आफ्नै कोठामा बन्धक बनाएको प्रहरीको भनाई छ । झकासले अन्य अपरिचित २ जना मानिसहरु समेतलाई बलात्कार गर्न लगाएको र कसैलाई भनेमा ज्यानमार्ने धम्की दिइको पीडित महिलाले प्रहरी समक्ष बताएको प्रहरीको भनाई छ । घटनाको थप अनुसन्धान र अन्य आरोपितहरुको खोजी भैरहेको रोल्पाका प्रहरी प्रमुख डिएसपी रमेश थापाले बताउनुभयो ।