रत्ननगर (चितवन), जेठ २९ नेपाली काँग्रेसको क्षेत्रीय कार्यालयमा आज तोडफोड भएको छ । अज्ञात समूहले फूलबारीमा रहेको क्षेत्रीय कार्यालयमा तोडफोड गरेको काँग्रेस चितवनका सभापति टेकप्रसाद गुरुङले जानकारी दिए । तोडफोडबाट झ्यालका सिसा फुटेका छन् भने टेबल कुर्सी समेत टुटफुट भएको सभापति गुरुङले बताए । तोडफोड गर्ने समूहको पहिचान भने खुलेको छैन । कुन उद्देश्यले तोडफोड गरिएको भन्नेबारे जानकारी नआएको र घटनाको अनुसन्धान भइरहेको प्रहरीले जनाएको छ । क्षतिको विवरण सङ्कलन भइरहेको काँग्रेसले जनाएको छ । सो क्षेत्र प्रधानमन्त्री सुशील कोइरालाको निर्वाचन क्षेत्र हो । उनले विजयी भएर सिट छाडेपछि रामकृष्ण घिमिरेले उपचुनावमा विजयी हुनु भएको थियो ।