कथित बोक्सी आरोपमा सिमरदही गाविस- ९ बहुअर्वाकी ३५ वर्षीया सविना खातुनलाई देवर र देवरानीले असार ९ गते निर्घात कुटपिट गरेका छन् । कुटपिटबाट बेहोस भएपटि खातुनलाई गाउँकै महिला अधिकारकर्मीले जिल्ला अस्पताल जलेश्वरमा उपचार्रार्थ भर्ना गरेका छन् । जिल्ला प्रहरी कार्यालय महोत्तरीले दिएको जानकारीअनुसार भैँसीले दुध नदिएको निहुँमा उनका देवर ३२ वर्षीय जीवर्रइल कवारी, देवरानी ३० वर्षीय जैलम खातुन र २८ वर्षीय अमिना खातुनले पीडितले टुनामुना गरेको भन्दै लाठी र धारिलो हतियारले शरीरका विभिन्न भागमा प्रहार गरी घाइते बनाएका थिए । सविनालाई मलमूत्र खुवाइने तयारी गरे पनि स्थानीय महिलाले प्रतिकार गरेका थिए । जिल्ला प्रहरी कार्यालयको महिला तथा बालबालिका सेवा केन्द्र पीडितले निवेदन दर्ता गराए पनि कारबाही प्रक्रिया अगाडि बढाएको छैन । घटनामा संलग्नहरू फरार भएको प्रहरीले जनाएको छ ।