रुपन्देहीमा एकजना युवकको हत्या भएको छ । इलाका प्रहरी कार्यालय बुटवलका अनुसार बुटवल–१३ बुद्धनगरका प्रेमबहादुर रोकाको चक्कु प्रहार गरी हत्या गरिएको हो । बाग्लुङ भीमगिठे–९ घर भएका ४६ वर्षका रोका बुटवल स्थित बुद्धनगरमा आफन्तकोमा बसेर खसीबोकाको कारोबार गर्दै आएका थिए । आक्रमणमा रोकासँगै रहेका योगेन्द्र खरेल गम्भीर घाइते भएका छन् । खरेलको भरतपुर मेडिकल कलेजमा उपचार भैरहेको छ । रोकामाथी मंगलबार राति घरतर्फ जाँदै गर्दा चक्कु प्रहार भएको प्रहरीले जनाएको छ । घटनामा संलग्न भएको आशंकामा केही व्यक्तिलाई पक्राउ गरिएको प्रहरीले जनाएको छ । पक्राउ गरिएकाको नाम भने प्रहरीले खुलाएको छैन ।