धर्म परिवर्तनको लागि पतिलगायत परिवारका सदस्यहरूले दबाब दिएपछि रामेछापको हिमगङ्गा गाविस- ६ की २० वर्षीया सुनीता श्रेष्ठले सम्बन्धविच्छेदका लागि साउन २६ गते जिल्ला अदालत रामेछापमा मुद्दा दर्ता गरेकी छिन् । रामपुर गाविस- ४ का भुवनलाल श्रेष्ठकी छोरी सुनीता श्रेष्ठले २०६८ सालको चैत २७ गते हिमगङ्गा -६ का नरबहादुर सुनुवारसँग विवाह गरेकी थिइन् । सुनीताले विवाह गर्नु अघि नरबहादुरका माहिला दाजु नरेश सुनुवार क्रिश्चियन धर्म मान्दथे । परिवारका अन्य सदस्य हिन्दु धर्म नै मान्दथे । उनको विवाहपछि नरबहादुर सहित परिवारका अन्य सदस्यले पनि क्रिश्चियन धर्म लिए । परिवारमा सुनिता मात्र हिन्दू धर्म मान्ने भइन् । त्यसपछि उनी माथि धर्म परिवर्तनको लागि परिवारको दवाव सुरु भयो । परिवारका सदस्यहरूले धर्म परिवर्तनको लागि दवाव दिएपछि आफू एक वर्षेखि माइतीमा नै आएर बस्दै गरेको उनले बताईन् । धर्म परिवर्तनको लागि दवाव आएपछि आफूले सो कुरा सहन नसकेर सम्बन्ध विच्छेद गर्न लागेको अदालतमा मृद्दा दर्ता गर्न आएकी सुनिताले बताइन् ।