नयाँ संविधान घोषणाको दिनलाई 'कालो दिन'को संज्ञा दिएका मधेसी मोर्चाका कार्यकर्ताहरूले असोज ३ गते एमालेका सभासद् ताराकान्त चौधरीको पातोस्थित घरमा कालो झण्डा झुण्ड्याएका छन् ।
'नेपालको संविधान २०७२' को घोषणाको विरोधमा टाउको र हातमा कालो पट्टी बाँधेर प्रदर्शनमा उत्रेका प्रदर्शनकारीहरूले राजविराज नपा-१ स्थित नेपाली काँग्रेसको जिल्ला पार्टी कार्यालयमा पनि कालो झण्डा झुण्ड्याएका छन् ।
यसअघि प्रदर्शनकारीहरूले भदौ २५ गते राजविराज नपा-२ स्थित एमालेका सभासद् रन्जु ठाकुर र राजविराज नपा-८ स्थित नेकपा संयुक्तका सभासद् मिथिला चौधरीको घरमा, भदौ २६ गते नेपाली काँग्रेसका सभासद्द्वय सुरेन्द्र यादवको राजविराज नपा-५ स्थित घरमा र सकलदेव सुतिहारको राजविराज नपा-८ स्थित घरमा एवं एमाओवादीका सभासद् उमेश यादवको राजविराज नपा-८ स्थित घरमा तथा भदौ २९ गते नेपाली काँग्रेसका सभासद् रन्जित कर्णको राजविराज नपा-५ स्थित घरमा कालो झण्डा झुण्ड्याएका थिए ।
संविधान घोषणालगत्तै जलाइयो, घरपसलमा ढुङ्गामुढा
नयाँ संविधानमा आफूहरूका माग सम्बोधन नभएको भन्दै मधेसी मोर्चाले राजविराज नपास्थित सहिद दशन चोक र बोदे बर्साइन गाविसस्थित चोकमा संविधानको नमूना जलाएका छन् ।
राष्ट्रपति रामवरण यादवबाट संविधान प्रारम्भको घोषणा भएलगत्तै मोर्चाआबद्ध युवा-बिदुयार्थीहरूले संविधानको नमूना जलाएर विरोध जनाएका हुन् ।