भीमदत्त नगरपालिका-३ तिलकपुरकी ३२ वर्षीया कमला लुहारको हत्या गरेको आरोपमा ३५ वर्षीय पति राम लुहारलाई कात्तिक ८ गते जिल्ला प्रहरी कार्यालयले गिरफ्तार गरेको छ । कुटपिटबाट घाइते भएकी कमला लुहारको कात्तिक ७ गते उपचारको क्रममा भारतको खटिमामा मृत्यु भएपछि कुटपिट गर्ने पतिलाई जिल्ला प्रहरी कार्यालयले कात्तिक ८ गते गिरफ्तार गरेको छ । घरनजिकैको जङ्गलमा पति पत्निबीच विवाद भएपछि पति रामले मरणसान्न गरी कुटपिट गरेर मारेको कमलाका माइतीपक्षले आरोप लगाएका छन । कुटपिटबाट बेहोस भएकी कमलालाई उपचारका लागि भारतको खटीमा लगिएको थियो । यस अघि पनि रामले पत्निलाई कुटपिट गर्ने गरेको कमलाका दाइ नन्दसिंह सुनारले बताए । मृतक कमलाको महाकाली अञ्चल अस्पतालमा कात्तिक ८ गते पोष्टमार्टम भएको छ । मृतकका आफन्तको उजुरीको आधारमा राम लुहारलाई गिरफ्तार गरी अनुसन्धान सुरु गरिएको जिल्ला प्रहरी कार्यालयका एसपी किशोरकुमार दाहालले वताए ।