१३ वर्षीया एक बालिकालाई कात्तिक २९ गते बलात्कार गरेको आरोपमा सिन्धुलीको ककुरठाकुर गाविस-६ हिमालचुलीका २० वर्षीय आकाश घलेलाई मङ्सिर १५ गते प्रहरी चौकी सिर्थौलीले गिरफ्तार गरेको जिल्ला प्रहरी कार्यालय, सिन्धुलीका इन्स्पेक्टर विपिन ओझाले बताए । आरोपित घलेलाई मङ्सिर १६ गते जिल्ला प्रहरी कार्यालय सिन्धुलीमा ल्याई अदालतबाट म्याद थप गरी अनुसन्धान सुरु गरिएको जिल्ला प्रहरी कार्यालय सिन्धुलीले जनाएको छ । स्थानीय महिला सहकारी संस्थामा उक्त जानकारी आएपछि सहकारीका महिलाको पहलमा मङ्सिर १४ गते जिल्ला प्रहरी कार्यालयमा उजुरी दर्ता भएको छ । पीडित बालिकाको मङ्सिर १४ गते जिल्ला अस्पताल सिन्धुलीमा स्वास्थ्य परीक्षण भएको छ ।