मधेसी मोर्चाका कार्यकर्ताले सर्लाहीको नवपुर नजिक राष्ट्रिय मानवअधिकार आयोगको गाडी तोडफोड गरी जलाएका छन् । साथै साथै गाडीमा रहेका आयोगका कर्मचारीलाई दुर्व्यवहार गरेका छन् । सर्लाहीमा एकै ठाउँमा मधेसी मोर्चा र चुरेभावरको कार्यक्रम भएकाले त्यसमा हुने सम्भावित मानवअधिकार हनन्का घटनाबारे अनुगमन गर्न मानव अधिकार आयोगको टोली गएको थियो । टोलीमाथि मोर्चाका कार्यकर्ताले कुटपिट गर्नुका साथै उनीहरु चढेको बा ७ च ७४७६ नम्बरको गाडीसमेत तोडफोड गरी आगो लगाएर पुर्णरुपमा क्षति पुर्याएको टोली संयोजक नितु गर्तौलाले जानकारी दिइन् । घरेलु हातहतियारसहित आएका मोर्चाका कार्यकर्ताले “हामी मानवअधिकार सधिकार केही पनि जान्दैनौ” भन्दै गाडी तोडफोड र आगजनी गरेको थिए । त्यसबाट आफनो क्यामरालगायत कागजपत्र जलेर नष्ट भएको साथै टोलीमा सहभागी इन्दिरा श्रेष्ठ, भीवा ढुङ्गानालगायतलाई चोट लागेको गर्तौलाले जानकारी दिइन् । रासस