संयुक्त लोकतान्त्रिक मधेशी मोर्चाका कार्यकर्ताले सर्लाही जिल्ला सदरमुकाम मलंगवास्थित दुई ओटा सरकारी कार्यालयमा पुस ६ गते दिउँसो आगजनी गरेका छन् । सङ्घीय समाजवादी फोरम नेपालका जिल्ला अध्यक्ष अशोक यादवलाई गिरफ्तार गरिएको विरोधमा मधेशी मोर्चाले प्रदर्शन गर्दै जिल्ला सदरमुकाम मलङ्गवास्थित खानेपानी कार्यालय, महिला तथा बालबालिका कार्यालयमा आगजनी गरेका हुन् । आगजनीका कारण खानेपानी कार्यालयको दुई ओटा कोठा र महिला तथा बालबालिका कार्यालयको पाँच ओटा कोठामा क्षति भएको प्रहरी नायव उपरीक्षक रमेश खड्काले बताए । आगजनीपछि प्रहरीले अवस्था नियनत्रणमा लिन र प्रदर्शकारीलाई तितरबितर गर्न १ सय ५० राउण्ड अश्रुग्याँस तथा केही राउण्ड रबरको गोली चलाएको खड्काले बताए । जिल्ला प्रशासन कार्यालय सर्लाहीमा तोडफोड गरेको आरोपमा पुस ५ गते राती गिरफ्तार भएका सङ्घीय समाजवादी फोरम नेपाल सर्लाहीका जिल्ला अध्यक्ष यादवलाई प्रहरीले सार्वजनिक अपराधको मुद्दा दर्ता गरेको छ ।

सन्तोषकुमार सिंह