१३ वर्षीया बालिकालाई जर्वजस्ती भगाएर विावह गर्ने ४५ वर्षका एक पुरुषलाई प्रहरीले पक्राउ गरेको छ। परियार थरकी बालिका विवाह गर्ने नेपालगन्ज–२६ बसुदेवपुरका ४५ वर्षीय घनश्याम पाललाई इलाका प्रहरी कार्यालय कोहलपुरले पक्राउ गरेको जनाएको हो। पालले दुई महिनाअघि स्थानीय जनता माविको कक्षा ८ मा अध्ययनरत ती बालिकालाई जर्वजस्ती भगाएर विवाह गरेका थिए। बालिका विवाह गरेको आरोपमा शनिबार बिहान इलाका प्रहरी कार्यालय कोहलपुरले उनलाई घरबाटै पक्राउ गरेको हो। प्रहरीले पालसंगै बालिकालाई पनि नियन्त्रणमा राखेको छ। बालिका आफन्तका अनुसार ४५ वर्षीय पालका घरमा पत्नि र चार छोराछोरी छन्। उनका जेठा सन्तान २१ वर्षका छन्। ईलाका प्रहरी कार्यालय कोहलपुरका डिएसपी राजीव बस्नेतले बालविवाह गर्ने पाल पक्राउ गरी नियन्त्रणमा राखिएको बताए। बालविवाहका बारेमा अनुसन्धान भैरहेको बताउँदै उनले कानुन बमोजिम आरोपितलाई कारवाही हुने बताए। बालिका परिवारको जाहेरीका आधारमा गरिने उनले भने। बालिका आफन्त भने प्रहरी र स्थानीय राजनैतिक दलबाट विवाह मिलाउनु पर्ने दवाव आएको बताएका छन्। हामीलाई बालविवाह मिलापत्र गर्नुप¥यो भन्दै स्थानीय नेताहरुबाट धम्की र दवाव आइरहेको बालिका आफन्त आशा विकले बताईन्। उनका अनुसार पालले विद्यालयमा पढ्न गएकी ती बालिकालाई बजार घुमाउने लोभमा भारतमा पुगेर विवाह गरेका थिए। ती बालिकालाई विद्यालयबाट भगाएपछि उनी दुई महिना भारतको मुम्बईमा बसेका थिए। दुई दिनअघि घर पुगेका पाल प्रहरीको फन्दामा परेका हुन्। बालिकाका आफन्तले पाललाई बालविवाह र अपहरण मुद्धामा कारवाहीको माग गरेका छन्।