१६ वर्षीया बालिकालाई यौनदुर्व्यवहार गरेको आरोपमा जिल्ला शिक्षा कार्यालयका लेखापाल महेश पन्त कार्यालय परिसरबाटै पुस २७ गते प्रहरीको गिरफ्तारीमा परेका छन् । आरोपितले पुस २४ गते बालिकाको संवेदनशील अंगमा छोएर बलात्कारको प्रयास गरेको अभिभावकले बताएका छन् । घटनाको दुई दिनपछि बालिकाले अभिभावकलाई जानकारी गराएपछि पीडितका आफन्त पुस २६ गते आरोपितको डेरामा पुगेका थिए । डेरामा उनी फेला नपरेपछि अभिभावक पुस २७ गते जिल्ला शिक्षा कार्यालयमा पुगेका थिए । कार्यालय पुग्नसाथ पीडितका अभिभावकले होहल्ला गर्न थालेपछि घटना सार्वजनिक भएको थियो । सोही क्रममा पीडितका अभिभावकले आरोपितमाथि कुटपिट गर्ने प्रयास गर्न लाग्दा आरोपित भागेर कार्यालय प्रमुखको क्वाटरमा पुगेका थिए । क्वाटरभित्र पसेका पन्तलाई प्रहरीले तत्काल गिरफ्तार गरेको जिल्ला प्रहरी कार्यालयका डिएसपी सुरेन्द्रबहादुर गुरुङले बताए । आरोपितविरुद्ध पीडित पक्षले पुस २७ गते जिल्ला प्रहरी कार्यालयमा उजुरी दिएको छ । भरत खड्का