घोघनपुर स्वास्थ्य चौकीका अहेव उपेन्द्रप्रसाद साहको कञ्चनरुप नपा-१ स्थित घरमा अज्ञात समूहले माघ ३ गते राती पाईप बम विष्फोट गराएको छ । घटनास्थलबाट १३ सेन्टिमिटर लामो र १६ सेन्टिमिटर गोलाई भएको जीआई पाईप तथा फलामको नटबल्टु फेला परेको इलाका प्रहरी कार्यालय कञ्चनरुपले जानकारी दिएको छ । इन्स्पेक्टर मेघराज अधिकारीकाअनुसार बम साहको घर अगाडि रहेको फूलबारीमा विष्फोट भएको थियो । बिष्फोटबाट मानवीय तथा भौतिक क्षति नभए पनि घटनापछि साह परिवार र छिमेकीहरू आतङ्कित बनेका छन् । भगतसिंह नाम बताउने व्यक्तिले भारतीय नम्बरबाट साहको मोबाइलमा फोन गरेर दस लाख रुपैयाँ चन्दा मागेको केही समय पछि नै बम बिष्फोट भएको साहले बताए । रकम नदिए सो समूहले उनका परिवारका सदस्यलाई मार्ने धम्कीसमेत पीडित साहले बताए । घटनामा संलग्नहरूको खोजी सुरु गरिएको इलाका प्रहरी कार्यालय, कञ्चनरुपले जनाएको छ । मनोहरकुमार पोखरेल