ताप्लेजुङको साँघु गाविस स्थित एक विवाहमा धान नाच्ने क्रममा भएको विवाद पछिको झडपमा एक युवक घाईते भएका छन् । साँघु नौ निवासी पुर्णबहादुर लिम्बुको छोराको विवाहमा धान नाच्ने क्रममा सोहि गाविस निवासी दुर्गा लिम्बु, मालटिन लिम्बु र दिनेश लिम्बुबीच भएको विवादमा झडप हुँदा दुर्गा लिम्बु घाईते भएका हुन् । दुर्गालाई मालटिन लिम्बु र दिनेश लिम्बुले खुकुरी प्रहार गरेको र उनको बाँयाँ गालामा गहिरो चेट लागेको जिल्ला प्रहरी कार्यालय ताप्लेजुङले जानकारी दिएको छ । घाईते लिम्बुलाई उपचारका लागि जिल्ला अस्पताल ताप्लेजुङ ल्याईएको छ भने खुकुरी प्रहार गर्ने दुबै जना फरार रहेकाले खोजिकार्य जारी रहेको प्रहरीले जनाएको छ । लिम्बु समुदायको विवाहमा महिला र पुरुषबीच हात समाएर धान नाच नाच्ने परम्परा छ । पछिल्लो समय ताप्लेजुङमा लिम्बु समुदायको विवाह र बरखिमा विवाद पछिको झडपका घटना बढेका छन् । धारीलो हतियार खुकुरी र भरुवा बन्दुक प्रहारका घटना पनि बढ्दै गएका छन् ।