जुम्ला जिल्ला पटमारा गाविस-२ स्थायी घर भई नेपाल खाद्य संस्थानको खाद्यान्न ढुवानी गर्दै आइरहेका ३५ वर्षीय रामचन्द्र थापा लिकु गाविस घर भएका तिन जना युवकको कुटाईबाट गम्भिर घाइते भएका छन । लिकु गाविस-५ घर भएका २८ वर्षीय रनबहादुर धरला, २५ वर्षीय रामु बोहोरा र २६ वर्षीय बिष्णु बोहोराले समयमा खाद्यान्न नदिएको र वितरणमा विभेद गरेको भन्दै चैत १९ गते लिकु गाविस-४ स्थित स्वास्थ्य चौकी भवन नजिक सेरा भन्ने ठाउँमा चिरपट दाउरा र फलामको कुर्सीसमेतले टाउकोमा हिर्काएर गम्भिर घाइते बनाएको घाइते थापाले बताएका छन् । टाउको र निधारमा गहिरो चोट लागेका रामचन्द्र थापाको जिल्ला अस्पताल दुनैमा उपचार भइरहेको छ । उपचारमा संलग्न चिकित्सक श्रीकान्त अग्रवालले घाइतेको अवस्था सामान्य हुँदै आएको बताए ।