समाचार लेखेको निहुँमा महोत्तरीबाट प्रकाशित हुँदै आएको द पब्लिक टुडे राष्ट्रिय दैनिकका समाचारदाता गौशला नपा–२ निगौल बस्ने ३५ वर्षीय रामबाबु यादवमाथि जेठ २२ गते कुटपिट भएको छ ।

गौशाला नगरपालिका–४ रजखोरका ४५ वर्षीय राजनारायण महतोले पत्रकार यादवलाई कुटपिट गरेका हुन् । कुटपिटबाट घाइते भएका पत्रकार यादवको उपचार गौशाला स्थित स्थानीय क्लिनिकमा भइरहेको छ ।

गत वैशाख १७ गते महतोले कान्छी पत्नीलाई कुटपिट गरी यातना दिने गरेकोसम्बन्धी समाचार द पब्लिक टुडे राष्ट्रिय दैनिकमा प्रकाशित गरेको निहुँमा आफूलाई कुटपिट गरेको पीडित पत्रकार यादवले बताए ।

आफ्नो चरित्र बदनाम गराउने गरी समाचार लेखेको भन्दै उनले आफ्ना दाजुभाइसहित यादवमाथि निर्घात कुटपिट गरेका हुन् ।

कुटपिटबाट घाइते भएका पत्रकार यादवको मुख र नाक फुटेको छ । ओठहरू सुन्निएको छ । ढाड र पिठ्यूँमा चोट लागेको छ ।

घटनाबारे थाह पाएपछि द पब्लिक टुडेका प्रकाशक रामनारायण महतो घटनास्थल पुगी घटना बारे बुझेर पीडित पत्रकार यादवलाई प्रहरीमा उजुरी गर्न भने अनुसार यादवले उजुरी गरेका छन् ।

उनले घटनाका आरोपित ४५ वर्षीय राजनारायण महतो, ४२ वर्षीय जयनारायण महतो र ४० वर्षीय जयकिशोर महतोविरूद्ध इलाका प्रहरी कार्यालयमा कुटपिट, घाउखतसम्बन्धी उजुरी दर्ता गराएका छन् ।

उजुरी दर्ता लगतै प्रहरीले पत्रकारलाई कुटपिट गर्ने राजनारायण महतोलाई गिरफ्तार गरी इलाका प्रहरी कार्यालय गौशला राखी अनुसन्धान थालेको प्रहरीले जनाएको छ ।

अजयकुमार साह