सौराहाको महिला नेचर गाइड समूहले बुधबार मृगकुञ्ज मध्यवर्ती उपभोक्ता समितिको कार्यालयमा तालाबन्दी गरेका छन् । चितवन निकुञ्जले सामुदायिक सीप केन्द्रबाट महिला नेचर गाइडलाई लखेटेपछि उनीहरूले मध्यवर्तीको कार्यालयमा तालाबन्दी गरेका हुन् ।

सो उपभोक्ता समितिअन्तर्गत रहेको सामुदायिक सीप केन्द्रमा सामान्य बोर्ड राखेर महिला नेचर गाइडहरूले व्यावहारिक ज्ञान हासिल गर्दै आएका थिए । महिला नेचर गाइडहरूले राखेको बोर्ड बुधबार निकुञ्जले हटाएको छ ।

सपना भिलेज सोसल इम्प्याक्टको आर्थिक सहयोगमा सीप केन्द्रले मध्यवर्ती क्षेत्रका १९ जना महिलाहरूलाई नेचर गाइड तालिम दिएको थियो । तालिम अन्तिम चरणमा आइरहँदा महिला नेचर गाइडहरूले सीप केन्द्रमा एउटा बोर्ड र टेबल राखेर व्यावहारिक ज्ञान सिक्दै आएका थिए ।

निकुञ्जको सौराहा सेक्टर कार्यालयले उनीहरूले राखेको बोर्ड र टेबुल नियन्त्रणमा लिएपछि आक्रोशित बनेका महिला नेचर गाइडहरूले मध्यवर्तीको कार्यालयमा तालाबन्दी गरेका हुन् । सीप केन्द्रका अध्यक्ष दुर्गाप्रसाद घिमिरेले निकुञ्जले महिला नेचर गाइडको काममा हस्तक्षेप गरेको बताए । 'यो मध्यवर्तीका बासिन्दाप्रति निकुञ्जले गरेको हस्तक्षेप हो', उनले भने, ‘यसलाई निकुञ्जले सच्याउनुपर्छ ।'