बारा । बोक्सीको आरोपमा बाराको पचरौता नगरपालिका २ श्रीनगर बैरियामा एकजना महिलामाथि निर्धात रुपमा कुटपिट गरी कपाल मुण्डनसमेत गरिएको छ ।

स्थानीय भोला मिया अन्सारी, ओजिर मिया अन्सारी र भोलाकी श्रीमतीले छिमेककी ५६ वर्षीया हिरवा देबी लोहारिनलाई बोक्सी आरोपमा गयराति घरमै पुगेर कुटपिटसहित दुव्र्यवहार गरेका हुन् ।

‘राति घरमा एक्लै बसेको बेलामा बोक्सी भन्दै घरभित्र पसेर एक्कासी कुटपिट गरेको पीडित लोहारिनले बताइन्। कुटपिटबाट टाउको र शरीरका विभिन्न भागमा चोट बोहोरेकी लोहारिनको हाल कलैयास्थित राजलक्ष्मी अस्पतालमा उपचार भइरहेको छ ।

यसअघि पनि उनीहरुले बोक्सी आरोपमा आफूलाई पटकपटक सार्वजनिक स्थलमा गालीबेइज्जत गर्दै आएको उनले बताइन् ।

बोक्सी आरोपमा महिलामाथि कुटपिट हुदै गरेको खबर पाएपछि गाउँकै प्रहरी चौकीका प्रहरी सहायक निरीक्षक राजिव सिंहको टोली पुगेर भोलालाई नियन्त्रणमा लिएको वडा अध्यक्ष मनोज यादवले बताए। अर्का आरोपी ओजिर र भोलाकी श्रीमती भने फरार बनेका छन । २ वर्षअघि पती रामाज्ञा ठाकुरको निधनपछि लोहारिन छोरा मिथिलेश शर्मासंगै घरमा बस्दै आएकी थिइन् ।

२० वर्षीय छोरा मिथिलेश पनि घटनाको समयमा घर बाहिर रहेका थिए । जिल्ला प्रहरी कार्यालय बाराका प्रहरी उपरीक्षक होबिन्द्र बोगटीले घटनामा संलग्न रहेको आरोपमा एकजना पक्राउ परेको र घटनाको बारेमा थप अनुसन्धान गर्ने क्रममा जिल्ला प्रहरी कार्यालयको टोली हिजो दिउसो घटनास्थल पठाइएको जानकारी दिए ।

काठमाडौँ । राष्ट्रियसभाका सांसद खिमलाल देवकोटाले मुलुक ऋणको जालोमा फस्दै गएको टिप्पणी गरेका छन् ।