विराटनगर उमनपा-३ मा सञ्चालनमा रहेको सेन्टमेरिज स्कुललाई कक्षा ८ को अनुमतिपत्र नदिइएको भन्दै असार ३० गते अभिभावकसहितको टोलीले जिल्ला शिक्षा अधिकारको कार्यकक्षमा तोडफोड गरेका छन् । कक्षा ८ मा अध्ययनरत विद्यार्थीका अभिभावकसहितको टोलीले जिल्ला शिक्षा अधिकारी देवेन्द्रराज खनालको टेबलको सिसा फुटाइदिएको छ । उनी कार्यकक्षमै रहेको अवस्थामा उक्त समूहले टेबलको सिसा फुटाएका हुन् । यसअघि पनि टोली आएर कक्षा-८ को अनुमतिका लागि आग्रह गर्दा अहिले कक्षा सञ्चालन गर्दै गर्नु पछि अनुमतिपत्र दिउँला भनी पठाएकाले आफूहरूले छोराछोरीलाई विद्यालय पठाएको तर हाल सम्म अनुमति नदिएको अभिभावक केदार कार्कीले बताए । कार्कीले जिल्ला शिक्षा कार्यालयले अनुमति नदिएमा कक्षा-८ मा अध्ययन गरिरहेका ८८ जना विद्यार्थीको भविष्य चौपट हुने भन्दै आक्रोशित समूहले उक्त तोडफोड गरेको बताए । जिल्ला शिक्षा अधिकारी खनालले भने यसभन्दा अघि विद्यालयको भौतिक पूर्वाधारलगायतका आवश्यक पूर्वाधार नपुगेकाले विभागबाटै अनुमति नदिएकाले स्वीकृति नदिएको बताए । विद्यालयले भने ०७२ पुस मसान्तभित्र आवश्यक कागजातहरू संलग्न गरी कक्षा-८ को सञ्चालनका लागि अनुमतिको माग गर्दै आवेदन पेश गरेको अभिभावक कार्कीले बताए ।