हुम्लाको सिमपुरमा रहेको प्रहरी कार्यालयमा स्थानीयबासीले आक्रमण गर्दा दुई प्रहरी जवानसहित तीन जना घाइते भएका छन् । सिमपुरमा लाग्ने साउने पूर्णिमा मेलामा भएको घटनाको विषयलाई लिएर स्थानीयबासी प्रहरी चौकीमा पुगेका थिए । त्यहाँ भएको झडपमा दुई महिला प्रहरी जवान घाइते भएका छन् । गाउँलेसँगको प्रतिकारमा प्रहरी जवान राधा वली र अञ्जना रोकाया घाइते भएका छन् । त्यस्तै स्थानीय किस्मती रोकाया पनि घाइते भएकी छन् । उनको जिल्ला अस्पतालमा उपचार भइरहेको छ । मेलाको अवसरमा आयोजित देउडा गीत प्रतियोगिताका क्रममा शनिबार राति कार्यक्रम स्थल पुगेका गोरख रोकायाले रक्सी पिएर गएको तथा महिलाहरुलाई जिस्काएको भन्दै प्रहरीले नियन्त्रणमा लिएको थियो । प्रहरी नियन्त्रणका क्रममा रोकायालाई प्रहरीले कुटपिट गरेको भन्दै स्थानीयले प्रहरी बिटमा प्रदर्शनसहित आक्रमण गरेका हुन् । रोकायाको जिल्ला अस्पतालमा उपचार गरी थप उपचारका लागि नेपालगन्ज पठाइएको छ । कार्यक्रममा आएका उनलाई प्रहरीले नियन्त्रणमा लिएर कुटपिट गरेको भन्दै प्रहरी ज्याजति बन्द गर्न माग राख्दै स्थानीयबासी प्रदर्शनमा उत्रिएका हुन् ।