अख्तियारको बर्दिबास कार्यालयले लेखापढि व्यवसायीहरुलाई मालपोत कार्यालय परिसरभित्र प्रवेश रोक लगाएपछि लेखापढी व्यवसायीहरु विरोधमा उत्रेका छन् । अख्तियारको बर्दिवास प्रमुख राजकुमार लम्सालले लेखापढी व्यवसायीहरु खुल्ला रुपमा घुसको चलखेल गरिरहेको प्रमाण रहेको भन्दै मालपोतका कामु प्रमुख गणेश मिश्रलाई फोन गरि कार्यालय परिसरमा प्रवेश गर्नबाट रोक लगाउन निर्देशन दिएपछि व्यवसायीहरुले मंगलबार कामकाज ठप्प पारेका छन् । लेखपढी व्यवसायीहरुलाई कामु प्रमुख मिश्रले बोलाएर आफुलाई यस्तो आदेश आएको र यसको पालना गरिदिनका लागि अनुरोध गरेपछि लेखा व्यवसायीहरु आन्दोलि भएका छन् । मालपोत कार्यालयका अधिकृत आविद अनसारीले आफुलाई आएको निर्देशन अनुरुप लेखापढि व्यवसायीहरुलाई परिसरमा नआउनका लागि भनेपछि उनीहरुले विवाद सृजना गरेका बताए । यता नेपाल लेखापढी कानुन व्यवसायी एसोसिएसनका मध्यमाञ्चल संयोजक राजकिशोर लाल कर्णले श्रम गरेर आय आर्जन गरिरहेकालाई परिसरमा आउनबाट रोक लगाउनु गैर कानुनी रहेको जनाए । उनले कामु प्रमुख गणेश मिश्रले बिहान ११ बजे कार्यकक्षमा बोलाएर परिसरमा लेखापढी व्यवसायीहरुलाई प्रवेश नगर्न मौखिक जानकारी गराएको बताए । त्यसैगरि एसोसिएसनका धनुषा अध्यक्ष श्री नारायण ठाकुरले कामु प्रमुखले जवरजस्ती आफुहरुसँग निर्णयमा हस्ताक्षर गर्न लगाउँदा आफुले हस्ताक्षर नगरेको बताए । यता विरोध भइरहेको समयमा सञ्चारकर्मीहरुसँग कुराकानी गरेको भन्दै एसोसिएसनका कोषध्यक्ष रामनारायण साहलाई पक्राउ गरेको छ ।