हुलाकी सडक नगरपालिका क्षेत्र भित्रबाट लैजादा ठूलो धनजनको क्षति र आफूहरुलाई उठिबास बनाउने भन्दै केही स्थानीयबासीहरु विरोधमा उत्रिएका छन् । मंगलबार राजविराजमा केही स्थानीयले प्रदर्शन गर्दै प्रमुख जिल्ला अधिकारी मार्फत प्रधानमन्त्रीलाई ज्ञापनपत्र बुझाउनका साथै पत्रकार सम्मेलन गरी आपत्ति जनाएका छन् । ज्ञापनपत्रमा प्रस्तावित भारदह– कञ्चनपुर राजविराज र बलानसम्मको ४४ किलोमिटर हुलाकी राजमार्ग नगरक्षेत्रबाट लैजाँदा राजविराज नगर भित्रको सयौँ घर परिवारको उठिबास हुने र सबै ऐतिहासिक संरचनाहरु समेत ध्वस्त हुने उल्लेख गर्दै हुलाकी राजमार्ग निर्माणका लगि नगरको शहरी क्षेत्रको उत्तर वा दक्षिणतर्फ कायम रहेको सडक र नगरहरुमध्येबाट नयाँ ढंगले सर्भे र सम्भाव्यत अध्ययन गर्नुपर्ने माग गरिएको छ ।