स्थानीय तहको निर्वाचनमा सुरक्षा प्रदान गर्ने म्यादी प्रहरीका रुपमा तालिम लिरहेकाहरुले जनकपुरमा प्रहरी प्रसाशनको बिरोधमा प्रदर्शन गरेका छन्। म्यादी प्रहरीका लागि प्रसाशनद्वारा दिईने तालिममा आफुहरुलाइ यातना दिएको भन्दै तालिममा सहभागी आक्रोशित बनेका हुन्। तालिमका क्रममा सोमबार एकजना महिला र तीनजना पुरुष बेहोस भएपछि अन्य तालिममा सहभागीहरुले होहल्ला गर्दै बिरोध प्रदर्शन गरेका हुन्। तराईमा गर्मि बढ्दै गएको अवस्थामा कडा घाममा पनि आफुहरुलाइ तालिम दिने गरिएको र सोहि क्रममा चर्को घाममा दौडाउने क्रममा साथीहरु बेहोश भएको म्यादीको तालिममा सहभागी युवाहरुले बताउनु भयो। आक्रोसित म्यादीहरुले जनकपुर अञ्चल प्रहरी कार्यालयमा हातमा लाठी लिएर केहीबेर होहल्ला गरेका थिए। तालिमका क्रममा बेहोश भएकाहरुमा जनकपुर उपमहानगर पालिका ९ निवासी ज्ञानु कर्ण , गोपालपुर निवासी पुनेश्कुमार यादव , जनकपुर १३ निवासी धिरेन्द्र कुमार दास, र धनौजी कटैयाका बिजय मुखिया रहेको जनकपुर अञ्चल अस्पतालले जानकारी दिएका छन्। म्यादी प्रहरीको प्रदर्शनका कारण केहि बेर तालिम स्थलमा तनाब उत्पन्न भएको थियो। प्रहरीको तालिम अलि कडा खालकै हुने गरेको र यस्तो अवस्थामा गर्मिले केहि तालिमकर्ताहरु बेहोश भएपछि होहल्ला भएको प्रहरी नायब उपरीक्षक मनोज यादवले बताउनुभयो। केहि बेहोश र केहिले नाटक पनि गरेका हुन् , उहाले भन्नु भयो। यस्ता प्रकारका बदमासी गर्नेहरुलाइ खोजेर कारबाही गर्छौ। धनुषामा हाल जिप्रका धनुषा अन्तर्गत ५०० र जनकपुर अञ्चल प्रहरी कार्यालय अन्तर्गत ३०० जनाले म्यादी प्रहरीको तालिम लिईरहेका छन्।