एक आत्महत्या घटनाको निश्पक्ष छानबिन माग गर्दै राजमार्ग बन्द गरेका सर्वसाधारणमाथि प्रहरीले लाठी चार्ज गरी राजमार्ग खुलाएको छ । जेठ २ गते कावासोती १६ की रविना अर्याल झुण्डिएको अवस्थामा फेला परेकी थिइन् । उक्त घटना आत्महत्या नभई हत्या भएको दाबी गर्दै स्थानीय आन्दोलनमा उत्रिएका हुन् । उनीहरुले घटनाको निश्पक्ष छानबिन हुनुपर्ने माग राखेका छन् । छानबिनको माग राख्दै स्थानीयले आज पूर्व–पश्चिम राजमार्ग अवरुद्ध गरेका थिए । राजमार्ग खुलाउन प्रहरीले ७ राउण्ड अश्रुग्यास प्रहार गर्नुको साथै लाठीचार्ज गरेको हो । लाठीचार्जबाट तीन जना घाइते छन् । प्रहरीले मृतकका बाबुलाई नियन्त्रणमा लिएर अनुसन्धान गरिरहेको छ । इलाका प्रहरी कार्यालय कावासोतीका डीएसपी राजेश थापाले घटनाको अनुसन्धान भइरहेको र पोष्टमार्टम रिपोर्ट आएपछि थप कुरा खुल्ने बताए । उनले तीन घण्टासम्म राजमार्ग अवरुद्ध भएकाले खुलाउन बल प्रयोग गरिएको बताए ।