बस दुर्घटनामा मृत्यु भएका ११ महिने बालकका आफन्तले यातायात बन्द गराएका छन् । गत जेठ २९ गते दिक्तेलबाट जयरामतर्फ गइरहेको बा २ ख ७०७१ नम्बरको यात्रु बसमा सवार रुपाकोट मझुवागढी नगरपालिका १२ जालपाका ११ महिने अजित विश्वकर्माको मृत्युपछि आफन्तले क्षतिपूर्ति नपाएको भन्दै बुधबार बिहानैदेखि अनिश्चितकालीन यातायात बन्द गराएका हुन् । प्रमुख जिल्ला अधिकारी प्रल्हाद पोखरेलसमक्ष पटक–पटक क्षतिपूर्तिको अनुरोध गर्दा बेवास्ता गरेको भन्दै यातायात बन्द गराएको मृतकका बाजे नरबहादुर विश्वकर्माले बताए । प्रमुख जिल्ला अधिकारी पोखरेलले भने क्षतिपूर्तिको प्रक्रिया बढेको बताएका छन् । यातायात बन्द हुँदा सर्वसाधारण समस्यामा परेका छन् ।