चोरेको आरोपमा बर्दिया बारबर्दिया नपा—९ खैरेनीकी एक महिलालाई स्थानीयको उपस्थितिमा कालोमोसो र जुत्ताको माला लगाइएकाे छ । २५ वर्षीया गीता शाहीमाथि ८ हजार चोरेको भन्दै सोही ठाउँकी दुई महिलाको नेतृत्वमा कालोमोसो लगाइएको हो । ईलाका प्रहरी कार्यालय, बाँसगढीका प्रहरी निरीक्षक चक्र डम्बर पालले सकुनी चौधरीलाई कालोमोसो लगाएको भन्दै अनुसन्धानका लागि नियन्त्रणमा लिएको बताए । सकुनीको ८ हजार रुपैयाँ चोरी भएको प्रहरीको भनाइ छ । स्थानीयले सकुनीले कालोमोसो नलगाएको दाबी गरेका छन् । कालोमोसो लगाउने योजनाकार र नेतृत्व गर्ने दुई महिलालाई प्रहरीले पक्राउ नगरेको भन्दै आक्रोश पोखेका छन् । सोमबार राति करिब सात बजे कालोमोसो लगाउँदा गाउँका ५०/६० जनाको उपस्थिति थियो, स्थानीयले नाम नलेखी दिन आग्रह गर्दै भने । घटनास्थल सदरमुकाम गुलरियादेखि करिब २५ किमि उत्तरमा पर्दछ । प्रहरीले कालोमोसो लगाउनेमाथि सार्वजनिक मुद्दा दर्ता गरी कारबाही गर्ने जनाएको छ ।