राहत वितरणमा नाम छुटाएको भन्दै बाढी पीडितले बर्दियाको गुलरिया नगरपालिका वडा नम्बर एक र दुईको कार्यालयमा तालाबन्दी गरेका छन् । आफुहरुको नाम छुटाई नक्कली बाढी पीडितलाई राहत वितरण गरेको भन्दै उनीहरुले आज तालाबन्दी गरेका हुन् । माग सम्बोधन नभएसम्म कार्यालयमा लगाएको ताला नखालिने उनीहरुले बताएका छन् । नगरपालिका र गाउँपालिकामार्फत जनप्रतिनिधिको रोहवरमा वितरण गरिएको नगद राहतमा पक्षपात भएको भन्दै स्थानीय आक्रोसित भएका छन् । नगरप्रमुख मुक्तीनाथ यादवले भने नक्कली बाढी पीडितलाई राहत उपलब्ध नगराएको बताउनुभयो । दुई ठाउँबाट राहत लिन खोज्ने लगायत विरुद्ध करीब डेढ सय जनाको उजुरी परेकाले छानबिन सुरु गरिएको प्रमुख जिल्ला अधिकारी नारायणप्रसाद भट्टराईले बताउनुभयो । हालसम्म बाढी पीडितका नाममा करीब २३ करोड रकम नगरपालिका र गाउँपालिकालाई निकासा गरिसकेको जिल्ला प्रशासन कार्यालयले जनाएको छ ।