शे–फोक्सुन्डो राष्ट्रिय निकुञ्ज डोल्पाका संरक्षण अधिकृत रामदेव चौधरीलाई नेपाल कम्यूनिष्ट पार्टीका कार्यकर्ताले मोसो दलेका छन् । निकुञ्जको कार्यालय सुलिगार्डस्थित चौधरीकै कार्यकक्षमा गएर मोसो दलिएको उक्त पार्टीद्वारा जारी विज्ञप्तीमा उल्लेख छ । शुक्रबार बिहान ११ बजेतिर करिब १२ जनाको समुहले चौधरीको अनुहार भरी मोसो दलेका थिए । चौधरीले आर्थिक हिनामिना गरेकाले सांकेतिक कारवाही गरिएको विप्लव समूहको आरोप छ । चौधरीलाई मोसो दल्दै गर्दा अन्य कर्मचारी र नेपाल कम्युनिष्ट पार्टीका कार्यकर्ता बीच ढुङ्गा हानाहान समेत भएको एक स्थानीयले बताए । घटनाबारे जिल्ला प्रहरी कार्यालय डोल्पामा बुझ्दा त्यसबारे कुनै जानकारी नआएको बताइयो ।