नेपाल नरसिंग संघको केन्द्रीय आह्वानमा मकवानपुरमा आन्दोलन सुरु भएको छ। मकवानपुरका सरकारी तथा निजी स्वास्थ्य संस्थामा कार्यरत नर्सहरुले विभिन्न मागमा सहमति जनाए पनि सरकारले पूरा नगरेको भन्दै आन्दोलन सुरु गरेका छन्। मकवानपुरका स्वास्थ्य संस्थामा कार्यरत नर्सहरुले हातमा कालोपट्टी बाँधेर बिरोध जनाएको जिल्ला जनस्वास्थ्य कार्यालय मकवानपुरमा कार्यरत नर्स मिलन घिमिरेले बताइन्। नर्सहरुमाथि विभिन्न शोषण भएको भन्दै नर्सहरु आन्दोलनमा उत्रिएका हुन्। मानवअंग प्रत्यारोपण केन्द्रका नर्सहरुमाथि भएको शोषण तथा अनियमितताका बिषयलाई लिएर आन्दोलनमा उत्रिन बाध्य भएको नेपाल नरसिंग संघले जनाएको छ। आन्दोलनको पहिलो चरणमा नर्सहरुले कालोपट्टी बाँधेर बिरोध गर्ने र लगत्तै अन्य आन्दोलन जारी राख्ने संघले जनाएको छ। माग पूरा नभएसम्म देशभर आन्दोलन जारी राख्ने संघले जनाएको छ।