बैतडीको सुर्नया गाउँपालिका वडा नम्बर – १ को वडा कार्यालयमा तालाबन्दी गरिएको छ । सुनर्या गाउँपालिका वडा नम्बर – १ ले तयार गरेका योजनाप्रति असन्तुष्टि जनाउँदै राजनीतिक दलका अगुवाले तालाबन्दी गरेका हुन् । नेकपा एमाले, नेकपा माओवादी केन्द्र तथा राप्रपाका प्रतिनिधिले हस्ताक्षर गरी निकालेको विज्ञप्तिमा वडा अध्यक्ष कलसबहादुर चन्दले एकलौटी निर्णय गरेको आरोप लगाएका छन् । वडामा आएको ६५ लाख मध्ये ६० लाख रुपैयाँ सडक निर्माणमा छुट्याएको र वडा भेलाको माग विपरित वडा अध्यक्षले बजेट खर्च गरेकाले तालाबन्दी गर्नुपरेको राप्रपाका जिल्ला सदस्य दशरथ चन्दले बताउनुभयो । यता वडा अध्यक्ष चन्दले भने वडा भेलाबाटै भएका निर्णयहरु कार्यान्वयन भैरहेको बताउनुभएको छ । उहाँले वडा र गाउँसभाबाटै पारित भएका योजनालाई कार्यान्वयन गरिरहेको बताउनुभयो । उहाँले भन्नुभयो ‘केही व्यक्तिले अनावस्यक रुपमा आरोप लागाएर भइरहेको विकासको कामलाई अवरुद्ध गरिरहेका छन् ।’ उहाँले केही व्यक्तिले आफूलाई ज्यानमार्ने धम्कीसमेत दिइरहेको बताउनुभयो । यस्तै वडामा तालाबन्दी गर्नेहरुलाई कारवाहीको प्रक्रियामा ल्याइने अध्यक्ष चन्दले बताउनुभयो ।