बसन्त गौतमले सरकारले स्वास्थ्य क्षेत्र सुधार्न खोज्नुको साटो सुधारको माग राख्नेलाई समेत हतोत्साही बनाउन खोजेको बताए । उनले नागरिकका साना मसिना समस्या समाधान गर्न छाडेर ठूला सपना सरकारले बाँडेको बताए । ‘नागरिकले फोहर पानी पिउन बाध्य भएका छन् । तर, प्रधानमन्त्री रेलमा मिनरल वाटर बेच्ने भनेर भाषण गरिरहेका छन,’ उनले भने, ‘यसैले बुझाउँछ, सरकारको काम गराई शैली कस्तो छ भनेर।’ अर्का अभियन्ता सिरोज कोइरालाले सरकारले केसीका माग सुनुवाई गर्न बेवास्ता गरेकोले दवाव दिनका लागि सहभागिता जनाएको बताए । उनले सरकारको कामगराई शैलीले जनताले राहत नभई आहत पाउने बताए । ‘केसीका मागलाई पुरा गर्न सरकारले वेवस्ता गरेको छ,’ उनले भने, ‘जनस्वास्थ्यमा खेलवाड नगर भन्दा पनि माफियाको पछि लागेर अघि बढिरहेको छ ।’ सहभागिहरुले केसीका माग जतिसक्दो पुरा गर्न दवाव दिएका थिए।