सर्लाहीको चन्द्रपुर गाउँपालिकाले विकासको नाममा खेती योग्य जग्गालाई विनास गरेको भन्दै किसानहरु आन्दोलित भएका छन्।गाउँपालिकाले खेतीयोग्य जमिनबाट मापदण्ड विपरित झन्डै १०-१० फिट गहिराइ र चौडाई माटो काटेर सडक बनाएपछि किसानहरु आन्दोलित भएका हुन्। पिडित किसानहरुले बिहीबार चन्द्रनगर गाउपालिकामा विरोध प्रदर्शन गरेका छन् । अधिकांश सडक बनाउँदा किसानहरुलाई जानकारी र छलफल समेत नगरी गाउँपालिकाले मनपरी जग्गा अतिक्रमण गरेर खेतलाई बर्बाद गरेको उनीहरुको गुनासो छ ।प्रमुख ३ वटा सडक नारीमनटोल-पाकवाबान-बबरजंग,नारिमनटोल-गाह्राटोल साविक बबरगंज वार्ड-६ र पोखरिया महादेवमठ-बिलैया बजार बनाउँदा दुवै तर्फबाटै माटो काटेका छन्।सडक बनाउने कुनै ऐन,नियम र निर्देशिका नै नबनाई बजेट सिध्याउने नाउँमा गाउपालिकाले धेरै सडकहरु बनाउँदा अशोभनीय,अवैज्ञानिक र गैरकानुनी तरिकाले खेती योग्य उर्भरा भुमिलाई बलजफ्ती अधिग्रहण गरी बनाएको किसानहरुले बताए ।