परीक्षा केन्द्र सार्नुपर्ने मागसहित आमरण अनशनमा बसेका विद्यार्थीलाई पूर्वाञ्चल विश्वविद्यालय परीक्षा व्यवस्थापन कार्यालय अगाडिबाट हटाइएको छ । नेपाल रेडक्रस सोसाइटी मोरङ शाखाको भवनमा रहेको परीक्षा व्यवस्थापन कार्यालय अगाडि अनशन बसेका विद्यार्थीलाई आइतबार राति प्रहरीले गेटबाहिर सडकमा निकालेको हो । विश्वविद्यालयले सडकमा निकालेपछि विद्यार्थीहरुले सडकमै पाल टागेर अनशन बसेका छन् । पूर्वाञ्चल विश्वविद्यालय अन्तरगतको सेन्ट्रल इन्जिनियरिङ कलेज जनकपुरका ६ जना विद्यार्थी तीन बुँदे माग पूरा नभएपछि आइतबारदेखि आमरण अनशनमा छन् । आइतबार राति प्रहरीले गेट बाहिर निकालेपछि सडकमै अनशन बसेको विद्यार्थी सरोज यादवले जानकारी दिए । परीक्षा केन्द्र सार्नुपर्ने, केन्द्राध्यक्षलाई कारवाही गर्नुपर्ने र छुटेको परीक्षा दिन पाउनुपर्ने मागसहित सेन्ट्रल कलेज जनकपुरबाट आन्दोलनका लागि गत बिहीबार विराटनगर आएका ६० विद्यार्थी माग पूरा नभएसम्म अनशन जारी राख्ने बताउँछन् । २६ गतेबाट परीक्षा बहिस्कार गर्दै आन्दोलन गरिरहेका जयप्रकाश ठाकुर, मुकेशकुमार सिंह, दीपक यादव, अमित साह, पुष्पेन्द्र यादव र प्रकाश साह आमरण अनशनमा बसेका छन् । तीमध्ये प्रकाश साह, अमित साह र दिपक यादवको स्वास्थ्यमा समस्या देखिन थालेको छ । निर्माणधीन धुलाम्मे सडकछेउमा पाल टागेर अनशन बसेका विद्यार्थीले माग पूरा नभएसम्म अनशन बस्ने बताएका छन् ।