जुम्लाको चन्दननाथ नगरपालिकाको गाडी अज्ञात समूहले आगजनी गरेको छ । चन्दननाथ नगरपालिकाको कार्यालय परिसरमा पार्किङ गरि राखेको क१झ १ नम्बरको गाडी गए राति आगजनी भएको जिल्ला प्रहरी कार्यालय जुम्लाले जनाएको छ ।

राति सवा एक बजे नगरपालिकाका पाले बिष्णुप्रसाद न्यौपानेले गाडीमा आगो लागेको थाहा पाएपछि सबैलाई जानकारी गराएका थिए । उनले भने ‘म सुतिरहेको थिएँ, ढोकामा अज्ञात व्यक्तिले ढक–ढक हान्यो, ढोका खोलेर हेर्दा गाडी जलिरहेको थियो ।’ त्यसपछि खबर गर्दा स्थानीय र प्रहरीको सहयोगमा आगो नियन्त्रणमा ल्याइएको हो ।

जलेको गाडी ४० लाख बराबरको भएको निमित्त प्रशासकीय अधिकृत ज्ञानेन्द्र बुढ्थापाले बताए । नगरपालिकाका मेयर भारत र प्रमुख प्रशासकीय अधिकृत रारा भ्रमणमा गएको नगरपालिकाले जनाएको छ ।