हेटौंडा/नेपाल सरकारले वृद्धि गराएको तलव नपाएको भन्दै हेटौंडा-८ स्थित सुपर लेमिकोट्स प्रालिका मजदुरहरु आन्दोलित भएका छन् ।

सरकारले वृद्धि गराएको ३ हजार ७ सय कम्पनीले दिन अस्वीकार गरेपछि सोमबारबाट उत्पादन ठप्प गरी आन्दोलन सुरु गरेको मजदुर तथा वार्ता टोलिका संयोजक रामकृष्ण ढकालले बताउनुभयो। गत मंसिर २० गते मजदुर र कम्पनी पक्षबीच भएको वार्तामा कम्पनी व्यवस्थापनले पौष ५ गतेसम्म माग पुरा हुने जनाएको थियो । ढकालका अनुसर सम्झौता वेवास्ता गर्दै कम्पनी अघि बढेपछि आन्दोलन गर्न बाध्य भएको हो। वृद्धि तलव कार्यान्वयन गर्ने समयसिमा हिजो सकिएकाले आजबाट उत्पादन नै रोक्का गरी आन्दोलन गर्नु परेको उनले बताए । कम्पनीले माग पुरा नगरेसम्म आन्दोलन जारी रहने जनाईएको छ । हेटौंडा औद्योगिक क्षेत्र भित्र रहेको सुपर लेमिकोट्स प्रालिमा ४५ जना मजदुर कर्मचारी रहेका छन्।