सुर्खेतबाट प्रकाशित हुने लोकमञ्च दैनिकका संवाददाता वीरेन्द्रनगर नपा–१० बस्ने २७ वर्षीय पुनम विसीलाई कुटपिट गरेको भन्दै वीरेन्द्रनगर नपा–१० का ३३ वर्षीय जनक राजी र ३५ वर्षीय नरबहादुर गुरुङविरूद्ध पीडितले जिल्ला प्रहरी कार्यालय, सुर्खेतमा जेठ १ गते उजुरी दिएका छन् ।

वीरेन्द्रनगर नपा–१० स्थित एक होटलमा परिवार सहित जन्मदिन मनाइरहेका पत्रकार विसीलाई मदिरा सेवन गरी कुटपिट गर्ने राजी र गुरुङ्गलाई प्रहरीले जेठ १ गते गिरफ्तार गरेको छ ।

जन्मदिन मनाएर घर फर्कने क्रममा होटेलको काउन्टरमा आएर रकम तिर्न लाग्दा मदिरा सेवन गरेका राजी र गुरुङले पत्रकार विसीलाई निर्घात कुटपिट गरेका थिए ।

कुटपिटबाट पत्रकार विसीको टाउको र दाहिने हातको कुइनोमा गम्भीर चोट लागेका कारण उनको उपचार स्थानीय देउती नर्सिङ्ग होममा उपचार भइरहेको छ ।

घटनाको जानकारी पाएपछि घटनास्थल पुगेको प्रहरीले राजी र गुरुङ्गले प्रयोग गरेको भे ८ प ७७५५ नम्बरको मोटरसाइकल नियन्त्रणमा लिएको थियो ।

मोटरसाइकललाई आधार मानेर घटनामा संलग्न दुवैलाई गिरफ्तार गरिएको जिल्ला प्रहरी कार्यालय, सुर्खेतका डिएसपी प्रदीपबहादुर क्षेत्रीले बताए ।

दुर्गा थापा