विराटनगर महानगरपालिकाले कर र शुल्कको दर बृद्धि गरेको एक वर्षपछि विराटनगरका व्यवसायीहरू आन्दोलनमा उत्रिएका छन् । महानगरपालिकाले करका दर अचाक्ली बढाएको विषय सञ्चार माध्यमले समेत उठाएका थिए । कानुनको अनभिज्ञता क्ष्यम्य नहुने सिद्धान्त भएपनि विराटनगरका व्यवसायीहरू भने महानगरले थाहै दिएन भनेर एक वर्षपछि आन्दोलनमा उत्रिएका छन् । व्यवसाय बढेको आधारमा कर बढाउनु पर्नेमा अध्ययन अनुसन्धाननै नगरी पााच सय प्रतिशतसम्म बढाएकाले आन्दोलन गर्नुपरेको व्यवसायीको तर्क छ । समय टरेपछि गुनासो आएकाले नगरसभाले निर्धारण गरेको कर तिर्नुको विकल्प नभएको महानगरपालिकाले जनाएको छ । समयमा चासो नदिने र समय घर्किसकेपछि गुनासो गर्ने आम नेपाली प्रवृत्तिलाई विराटनगरका उद्योगी, व्यवसायीको आन्दोलनको यो घटनाले गतिलो पाठ सिकाएको छ ।