उपचारको क्रममा विरामीको मृत्यु भएपछि विराटनगर २ मा रहेको बिराट नर्सिङ होममा तनाव भएको छ ।बिराटचोककी चरीमाया प्रसाईको उपचारको क्रममा मृत्यु भएपछि आफन्तले चिकित्सकले लापरवाही गरेको भन्दै प्रदर्शन गरेपछि अस्पतालमा तनाव भएको हो ।

उपचारको क्रममा भएको लापरवाहीले चरीमायाँको ज्यान गएको मृतकका आफन्तले दावी गरेका छन् । अस्पतालमा प्रसाईको पाठेघरको नशा खुम्चने समस्याको शल्यक्रिया गरिएको थियो । चरिमायाको डाक्टर ज्ञानेन्द्रमान सिह कार्कीको टिमले शल्यक्रिया गरेका थिए ।

यता अस्पताल प्रशासनले भने उपचारमा कुनै पनि लापरवाही नगरेको दावी गरेको छ । अहिले अस्पताल प्रशासन र विरामीका आफन्त विच आन्तरिक छलफल भईरहेको छ ।

जिल्ला प्रहरी कार्यालय मोरङका डिएसपी घनश्याम श्रेष्ठले महिलाको मृत्यु भएको घटनामा आफन्तजन आक्रोशित भएर नर्सिङमा सामान्य तोडफोड भएको बताए ।

मोरङ प्रहरीले ५ जनालाई पक्राउ गरेको जनाएको छ ।धरान-विराटनगर सडक खण्डमा टायर बालेर सडक जाम गर्न खोज्दा उनीहरुलाई प्रहरीले पक्राउ गरेको हो ।अन्य तनाव उत्पन्न हुन नदिन मोरङ प्रहरीले बाक्लो मात्रामा प्रहरी परिचालन गरेको छ ।