ऋषिङ गाउँपालिकाको नयाँ भवनको शिलान्यास गर्ने कार्यक्रमलाई सत्तारूढ नेपाल कम्युनिष्ट पार्टी (नेकपा) का कार्यकर्ताहरूले अवरोध गरेका छन् ।
सो गाउँपालिकाको वडा नम्बर ७ को पोखरीभञ्ज्याङमा असोज १२ गते आयोजना गरिएको गाउँपालिकाको भवन शिलान्यास कार्यक्रमलाई नेकपाका कार्यकर्ताहरूले अवरोध गरेका थिए ।
भवन शिलान्यास कार्यक्रममा आएका नेपाली कांग्रेसका केन्द्रीय सदस्य तथा पुर्व मन्त्री डा. मिनेन्द्र रिजाललाई नेकपा कार्यकर्ताहरूले बाटोमा अवरोध गरेका थिए ।
नेकपा कार्यकर्ताहरूले भिमाद–ऋषिङ सडक खण्डको चार/पाँच ठाउँमा रुख ढालेर अवरोध गरेका थिए । साथै हातमा लाठी लिएका नेकपा कार्यकर्ताहरूले डा. रिजाललाई तिन घण्टा घेरा हालेर राखी कार्यक्रम स्थलमा जान रोक लगाएका थिए ।
आफ्ना नेतालाई नेकपाका कार्यकर्ताले अवरोध गरेको सूचना पाएपछि भिमादबाट ठुलो सङ्ख्यामा नेपाली कांग्रेसका कार्यकर्ताहरू गएपछि नेकपाका कार्यकर्ताहरू पछि हटेका थिए ।
सम्भावित भिडन्त रोक्न प्रहरी परिचालन गरिएको र कुनै अप्रिय घटना नभएको जिल्ला प्रहरी कार्यालय तनहुँका एसपी बिनोद सिलवालले बताए ।
गाउँपालिकाले सर्वसम्मत रूपमा वडा नम्बर ७ को पोखरीभन्ज्याङमा नयाँ भवन बनाउने निर्णय गरी सोही अनुसार शिलान्यास कार्यक्रम आयोजना गरिएको गाउँपालिकाका अध्यक्ष राजेन्द्रकृष्ण श्रेष्ठले बताए । सो भवन ३ करोड ६१ लाखको लागतमा निर्माण गरिने अध्यक्ष श्रेष्ठले बताए ।
नेपाल कम्युनिष्ट पार्टी (नेकपा) का कार्यकर्ताहरूले भने तत्कालिन सर्वदलीय संयन्त्र र जिल्ला स्तरको प्राविधिक समितिको सिफारिस र निर्णय विपरीत पोखरीभञ्ज्याङमा गाउँपालिकाको भवन बनाउन लागिएको भन्दै कार्यक्रम अवरोध गरेको जनाएको छ ।
सोही गाउँपालिका घर भएका नेकपा जिल्ला कार्यालय सचिव राजेश्वर ढकालले राजपत्रमा प्रकाशित सूचना र सर्वदलीय सहमति विपरीत गाउँपालिकाले केन्द्र सार्ने सम्बन्धमा गरेको निर्णय आफूहरूलाई मान्य नहुने बताए ।
उनले कार्यक्रम स्थलमा जम्मा भएका नेकपाका कार्यकर्ताले गाउँपालिकाको केन्द्र बनाउने निर्णयमा आफूहरूको असहमति रहेको भन्दै शिलान्यास नगर्न प्रमुख अतिथि रिजाललाई अनुरोध गरिएको बताए ।
शिलान्यास पछि बोल्दै कांग्रेस नेता रिजालले लोकतन्त्रमा विरोध गर्न पाइने भएपनि भौतिक रूपमा आक्रमण गरी कार्यक्रममा अवरोध गर्ने कार्य लोकतन्त्र विरोधी भएको बताए ।
प्रकाशचन्द्र भट्टराई
