रुकुम पूर्वको सिस्ने गाउँपालिका वडा नम्बर ३ मा रहेको जनता माविमा विद्यार्थीहरुले ताला लगाएका छन्। विद्यालय व्यवस्थापन समितिको गठनमा एकलौटी गरेको भन्दै विद्यार्थीले विद्यालयमा ताला लगाएका हुन् ।

बुधवार विद्यालयमा भएको अभिभावक भेलाले नयाँ व्यवस्थापन समिति गठन गरेको थियो। तर विद्यार्थीहरुले अभिभावकको कुरा नसुनेर केही व्यक्तिले एकलौटी तरीकाले विद्यालय व्यवस्थापन समिति गठन गरेको भन्दै ताला लगाएका हुन् । विद्यालय व्यवस्थापन समितिको अध्यक्ष जनक केसी र नन्दराम लामिछाने को बन्ने विषयमा सहमति हुन नसक्दा सबै अभिभावक विद्यालयबाट फर्किसकेको समयमा राति केही व्यक्तिले विद्यालय व्यवस्थापन समितिको अध्यक्षमा नन्दराम लामिछानेलाई सिफारिस गरेको हरिकृष्ण केसीले आरोप लगाउनुभयो ।

विद्यालयका प्रधानाध्यापक कलु खड्काले गाउँपालिकाको शिक्षा शाखााको प्रक्रिया अनुसार नै विद्यालय व्यवस्थापन समिति गठन गरिएको बताउनुभयो । विद्यार्थीले लगाएको ताला खुलाउनका लागि सहमतिको प्रयास गरिने उहाँको भनाइ छ। विद्यालयमा ताला लगाउँदा विद्यालयमा पठनपाठन अवरुद्ध भएको छ। बिहान विद्यालयमा आएका विद्यार्थी सबै घर फर्किएका छन्।