दैलेख : दैलेखको सदरमुकामस्थित नारायण नगरपालिका–१ को त्रिभुवन माध्यामिक विद्यालयको क्वारेन्टाइनमा बसेका कोरोना संक्रमितहरु आन्दोलनमा उत्रिएका छन् ।

नारायण नगरपालिकाका विभिन्न वडाका कोरोना संक्रमितहरुलाई त्यहाँ राखिएको थियो । नारायण नगरपालिका–१ का वडाध्यक्ष तिर्थनारायण श्रेष्ठका अनुसार २९ जना पीसीआर पोजिटिभ सहित ४३ जनालाई त्यहाँ राखिएको छ । उनीहरुको गत जेठ २७ गते दोस्रो पटक स्वाब संकलन गरेर परीक्षणका लागि कर्णाली स्वास्थ्य विज्ञान प्रतिष्ठानको प्रयोगशालामा पठाइएको वडाध्यक्ष श्रेष्ठले बताए ।

स्कुलको क्वारेन्टाइनमा बसेको एक महिना बितिसक्दा समेत ल्याबको रिपोर्ट आउन ढिलाइ भएको र आफूहरु घर जान पाउनुपर्ने माग राख्दै त्रिभुवन माध्यामिक विद्यालयको गेट अगाडि सडकमै आन्दोलनमा उत्रिएका कोरोना संक्रमितहरुलाई प्रहरीले लाठी चार्ज समेत गरेको छ । प्रहरीको लाठी चार्जबाट चार जना घाइते भएको बताइएको छ ।

घाइतेहरुलाई सरस्वती मावि तर्ताङ्गस्थित दैलेख अस्पतालको आइसोलेसन बार्डमा लगिएको छ । आन्दोलनमा उत्रिएका कोरोना संक्रमितहरुका अभिभावकले नगरपालिकाका जनप्रतिनिधिहरुले नै नेपाल प्रहरी र सशस्त्र प्रहरीलाई बोलाएर लाठी चार्ज गरेको आरोप लगाएका छन् ।

एक कोरोना संक्रमित युवाका बुबा सुर्यप्रसाद रेग्मीले भने ‘मेरै आँखा अगाडी मेरो छोरालाई कुटपिट भयो, घरबाट केही सामान लिएर आएको थिएँ, त्यो सामान दिन समेत पाइन, कि त रिपोर्ट छिटो निकाल्नुप¥यो, नभए घर पठाइदिनुप¥यो, यसरी किुटपिट गर्न पाइँदैन ।’

जिल्ला प्रहरी कार्यालय दैलेखका प्रहरी निरीक्षक उपेन्द्रप्रसाद आचार्यका अनुसार दोस्रो पटकको रिपोर्ट आउन ढिलाइ भएको र आफहरु घर जान पाउनुपर्ने माग राख्दै बजारमै आएर आन्दोलन गर्दै गालीगलौज गरेपछि लाठी चार्ज गर्नुपरेको हो । ‘स्थिति नियन्त्रणमा लिन खोज्दा झडप भएको हो,’ प्रहरी निरीक्षक आचार्यले भने ‘आन्दोलनमा उत्रिएकाहरु लट्ठी लिएर प्रहरीलाई नै आक्रमण गर्न खोजेपछि लाठी चार्ज गर्नुपरेको हो ।’