चौरजहारी नगरपालिका–८ सोतीमा भएको घटनामा मृत्यु हुने ६ जनाको पोस्टमार्टम रिपोर्ट गलत दिएको भन्दै पीडित पक्ष आन्दोलित भएका छन् । पीडित पक्षले सोमबार स्वास्थ्य सेवा कार्यालय जाजरकोटमा डाक्टरविरुद्ध नाराबाजी गर्नुका साथै तोडफोडसमेत गरेका छन् । रिपोर्टमा पानीमा डुबेर मरेको, गणेश बुढाको शरीरबाट गन्ध आएको, नवराज विकको केही नलेखेको पीडित पक्षको दाबी छ ।

मृत्यु हुने ६ जनाको शरीरभरि ठाउँठाउँमा चोट लागेको देख्दादेख्दै उल्टो रिपोर्ट दिने डाक्टरलाई कारबाही गर्नुपर्ने भन्दै पीडित पक्ष र आफन्तले नाराबाजी गरेका थिए । आन्दोलनकारी र प्रहरीबीच भएको झडपमा सातजना घाइते भएका छन् ।

सांसद देवेन्द्र पौडेलको नेतृत्वमा आएको सांसदीय समितिले मंगलबारदेखि सोती घटनाको विषयमा छानबिन थाल्ने भएको छ । सोमबार जाजरकोट सदरमुकाम आइपुगेको टोलीले सबैलाई भेट्ने कार्यक्रम रहेको प्रमुख जिल्ला अधिकारी जनकराज पन्तले बताए ।