धनुषा, ९ साउन । धनुषाको धनुषाधाम नगरपालिकामा स्थानीयले तालाबन्दी गरेका छन् । नगर प्रमुख बालेश्वर मण्डलले आर्थिक चलखेल गर्दै आवश्यक नभएको ठाँउमा पनि बाँध निर्माणका लागि उपभोक्ता समितिसँग मिलेर रकमको चलखेल गरेको भन्दै स्थानीयले असन्तुष्टि जनाउँदै नगरपालिकामा ताला लगाएका हुन् । 

अनावश्यक ठाँउमा बाँध निर्माण गरेपछि अधिकांश वस्तीहरु डुबानमा परेको भन्दै पीडित सिकियाहा टोलवासीहरु नगरपालिकाको कार्यालयमा पुगेर आन्दोलन गरेका छन् । डुबान प्रभावित सिकियाहा टोलका स्थानीयले नगरपालिकाको कार्यालयमा तालाबन्दी गर्नुका साथै प्रदर्शन समेत गरेका हुन ।

धनुषाधाम नगरपालिकाका मेयर, उपमेयर, प्रमुख प्रशासकीय अधिकृत र लेखापाल मिलेर भ्रष्टाचार गरेको उनीहरुको आरोप छ । अहिले जनप्रतिनिधि र कर्मचारीहरुकै कारण आफुहरु डुबानको समस्यामा परेको उनीहरुको दुःखेसो छ ।