२३ जेठ, वीरगञ्ज । तोकिएको समयमा सडक बनाएको भन्दै वीरगञ्जमा स्थानीयले पप्पु कन्स्ट्रक्सनको विरुद्धमा प्रदर्शन गरेका छन् ।

वीरगञ्ज महानगरपालिका वडा नं २० अपौनी र हरपतगञ्जका स्थानीय बासिन्दाले विरोध प्रदर्शन गरेका हुन् । उनीहरुले पप्पु कन्स्ट्रक्सनका सञ्चालक सुमित रौनियार, निलम्बित सांसद हरिनारायण रौनियार र शहरी विकास तथा भवन डिभिजन कार्यालयका प्रमुखको पुत्ला जलाएका छन् ।

ठेकेदारले समयमै काम सम्पन्न नगरेका कारण आफूहरुले सास्ती भोग्नुपरेको गुनासो उनीहरुको छ । वीरगञ्जको उदयपुर घुर्मीबाट अपौनी हुँदै हरपतगञ्ज ड्राइपोर्ट निस्कने सडक, वीरगञ्ज महानगरपालिका–१८ सौराहाबाट अपौनी हुँदै सुगौली थानासम्मको सडक निर्माणको जिम्मा पप्पुले पाएको छ ।

वडा नं २० का स्थानीय नेता राम किशोर सिंह परागले सडक निर्माण गर्ने जिम्मा लिएर काम नगरेपछि बाध्य भएर प्रदर्शनमा उत्रनुपरेको बताए ।

स्थानीयले पप्पु कन्स्ट्रक्सनका कर्मचारी चढेको गाडीलाई नियन्त्रणमा लिएका थिए । प्रहरी टोली पुगेपछि उनीहरुले गाडी छोडिदिएका थिए । जिल्ला प्रहरी कार्यालय पर्साका प्रवक्ता प्रहरी नायव उपरीक्षक ओमप्रकाश खनालले प्रदर्शनमा उत्रिएका स्थानीयलाई प्रहरीले तितर वितर पारेको बताए ।